ڈاکٹر سلطانہ فاطمہ انصاری
ادب أطفال اورمختارؔ ٹونکی
(شاعری کے حوالہ سے)
ادب زندگی کی ترجمانی کر تاہے ادب کے ذریعہ زندگی میں پیش آ نے والے روزمر ہ کے واقعات، خیالات و احساسات کو آسان اور عام فہم انداز میں پیش کیا جاتاہے۔یہ زندگی کے واقعات و خیالات کے ساتھ زندگی کے تجربات کا بھی خلاصہ کرتاہے ادب زندگی کے مسائل کو پیش کرنے کا ایک بہترین وسیلہ ہے۔
ادب کی تعریف کر تے ہوئے ڈاکٹر عابد حسین کہتے ہیں کہ
ــــ’’ادب شاعر یا ادیب کے ذہن میںسو ئے ہو ئے خیالات کا نام ہے جو زندگی کی
چھیڑسے جاگتے ہیںزندگی کی آ نچ میںتپتے ہیں اور زندگی کے سانچے میں ڈھل کر
خودزندگی بن جاتے ہیں ‘‘
( ادب کا مطالعہ از اطہر پرویز ص ۳۳ ۱۹۸۶ء )
ادب جہاں بڑوں کی خواہیشات اور مزاج کے مطابق ہوتا ہے۔وہی بچوںکے شوق اور دلچسپی کے ساتھ ان کی نفسیات اور فطرت کے مطابق بھی ہوتا ہے۔دوسرے الفاظ میں ہم یوں کہ سکتے ہیں کہ بچوں کے ادب سے مراد وہ ادب ہے جو ہرعمر کے بچوں کی نفسیات ، شوق ، دلچسپیوں اور ضرورتوں کومدنظررکھتے ہوئے لکھا جائے اور ان کی زبان و بیان ، عقل وفہم ،شعور اور قوت متخیلہ کوسامنے رکھ کر دلچسپ موضوعات کا انتخاب کیا جا ئیے۔
بقو ل شفیع الدین نیر ؔ:
’’جواد ب چار پانچ سال کی عمر سے لے کر چودہ، پندرہ برس تک کے بچوں کے لئے
مخصوص ہو اسے ہم بچوںکے ادب سے تعبیر کر سکتے ہیں ۔ ‘‘
(مغربی بنگال اور بچوں کا ادب عاصم شہنواز شبلی ص ۱۳)
اردو ادب میں ادب اطفال ابتدا ہی سے عالم وجود میں آگیاتھا۔ فارسی کی کتاب نصاب النصاب کو اردو کی نصابی نوعیت کا پہلا نمونہ قرار دیا گیا ہے ۔جس میں عربی و فارسی کے اشعار موجود تھے ۔ اس کے علاوہ خالق باری سے بھی ادب اطفال کا آ غاز مانا جا تاہے ۔لیکن ادب اطفال کا زیادہ تر ذخیرہ سر سید اور ان کے رفقاء کی بدولت ہے۔اس ادب کی بنیاد کا استوار کرنے میں خواجہ الطاف حسین حالی ،شبلی نعمانی اور محمد حسین آ زاد کے ساتھ اس کارناموں کو آ گے بڑھانے میںعلامہ اقبال، پنڈت برج نرائن چکبست ، درگا سہائے سرور جہاں آ بادی، تلوک چند محروم اور حامد اللہ افسر وغیرہ کا نام قابل ذکر ہے۔
عہد حاضر میں ادب اطفا ل کی آ بیاری کر نے اوراس میں اضافہ کر نے والوں میں مختارؔ ٹونکی کا نام قابل ذکر ہے ۔ مختارؔ ٹونکی طنز و مزاح نگار کے ساتھ ساتھ منفرد شاعر بھی ہیں اسی کے ساتھ ان کی پہچان ایک اطفالی ادب کے شاعر اور نثر نگار کی حیثیت سے بھی ہے۔
موصوف نے اطفالی ادب کے تعلق سے شعری اور نثری دو نوں اصناف میںخامہ فرسائی کی ہے شاعری میں بچوںکے لیے انھوںنے نئے نئے انداز میں مختلف موضوعات پر جہاں خوب نظمیںلکھی ہیںوہیں انھوں نے نثر میں بچوںکے لیے کہانیوں کے ساتھ دلچسپ جاسوسی ناولٹ بھی تحریر کیے ہیں۔ کہانیوں میں بچوں کے لیے حقیقی موضوعات پر’’سچی کہانیاں‘‘ اور’’ دیسی لوک کہانیاں‘‘ کے عنوان سے شائع کی ہیںناولوں میں ’’ عیار عورت‘‘’’ خونی غبارے ’’ ڈاکو نیلم ‘‘ اور پر اسرار فقیر شامل ہیں۔
شاعری کی حوالے سے مختارؔ ٹونکی کابچوں کے لیے خاص طور پر ایک مجموعہ’’ یہ دنیابچوں کی ‘‘ کے عنوان سے ہے اس مجموعے میںشامل نظمیں بچوں کے اعتبار سے کافی اہمیت کی حامل ہیں۔ان کا یہ مجموعہ کلام ۲۰۱۳ء میں منظر عام پر آیا تھا جو تقریبا ً ۷۶ چھوٹی چھوٹی نظمیں شامل ہیں جواپنے نئے آ ہنگ اور نئے اندازبیان و نئے خیالات کے ساتھ اپنے ننھے منے قارئین کے لیے لکھی ہے ۔
موصوف نے اس مجموعے میں بچوں کی ذہنیت ، خیالات ، نفسیات کے ساتھ صلاحیت کو ملحوظ رکھتے ہوئے قومی ، وطنی ،اخلاقی ، پندو نصیحت ، مذہبی اور دینی ،شجاعت و بہادری ، علمی و ادبی ،نیچرل اور درس و تدریس جیسے موضوعات کو سامنے رکھ کر نظمیں لکھیں تاکہ بچوں کی مثبت انداز میںتربیت ہوسکے۔
’’یہ دنیا بچوں کی ‘‘مجموعہ میں موصوف نے اپنی نظموں کی ابتدا ’’حمد باری تعالی ‘‘سے کی ہے ۔ خدا نے اپنی تمام ہی
مخلوقات کو ذاتی صفات عطا کی ہیں۔ اس کا ذکر نظم میں کیاگیا ہے ۔ نظم کے آخر میں مختارصاحب خود اپنی شاعرانہ عظمت کا شکر ادا کرنا ہوئے کہتے ہیں کہ:
سجدے لٹا رہے ہیں تیری یہ بندگی میں بندوںکو سر جھکانا کس نے سکھایا تونے
اشعار حمدیہ جو مختا ر ؔکہہ رہا ہے یہ رنگ شاعرانہ کس نے سکھایا تونے
خداکی حمد کے بعد سرور کا ئنات محمد ﷺ پر پیارے محمدﷺ کے نام سے ایک نعت ہے۔ اس میںانھوں نے آ پ کی توصیف عظمت و شان اور بہادری کی تعریف بیان کر کے شفاعت کی طلب کی ہے۔ جو بڑے ہی دل کش اور محبت بھرے انداز میں بیان کی گئی ہے کہ :
مصیبت اٹھائی سہے ظلم لیکن کبھی دشمنوںسے نہ ہارے محمدؐ
انہی کی شفاعت کا بس آسراہے ہمارے ہیں بے شک ہمارے محمدؐ
یقین شفاعت ہے مختا رؔ ہم کو محمد کے ہم ہیں ہمارے محمدؐ
مختا رؔ ٹونکی کی نظموں میں دینی اور مذہبی نظمیں اونچا مقام رکھتی ہیں۔ مذہبی اور دینی نظموں کے تحت خدا
کی شان و شوکت ، عظمت و طاقت، خداکی قدرت کی کاریگری کا جاہ و جلال کے ساتھ اعتراف کیا ہے۔ ان کے اس مجموعے میں ا س نوعیت کی بہت سے نظمیںہیں۔جن عنوانات درج ذیل ہیں۔
بتاؤ تو بھلا، ھوا لرزاق ،سب سے بڑا خدا ہے،قدرت کی کاریگری ، رب کا شکر ادا کر بھائی ، رب کی دین ،قدرت کا کارخانہ ، وغیرہ اس بابت چند مثالیں مندرجہ ذیل ہیں:
جورب ہے کل جہان کا اسی رب کا وہ کھاتے ہیں
کروڑوں لوگ دنیا کے اسی سے رزق پاتے ہیں
جہاںکو رزق دیتاہے
بڑا رزاق ہے اللہ ( ھوالرزاق)
ہاںہاں ! وہ کبریاہے سب سے بڑا خد اہے
اوجھل ہے آ نکھ سے وہ پید ا کئے اسی نے
دیکھا نہیں کسی نے چوپائے اور پرندے ہے دور وہ سمجھ سے دنیا ہے یہ اسی کی
سمجھا کسی کسی نے ہم بھی اسی کے بندے
یہ دل کا فلسفہ ہے دیکھو تو ماجرا کیا ہے
سب سے بڑا خدا ہے سب سے بڑا خدا ہے
( سب سے بڑا خد اہے)
بچوں کو اگر ابتدا ہی سے علم دین کی تعلیم دی جائے تو یہ ان کی شخصیت کی تعمیر میں معاون ثابت ہوتی ہیں ۔ دینی تعلیم سے ہی بچے سلیقے مند زندگی بسر کر نے کے ساتھ خوش اخلاقی کے زیور سے بھی آ راستہ ہو تے ہیں ۔ یہی درس انہوں نے اپنی نظموں میں دیا ہے۔
موجودہ دو رمیں تعلیمی نصاب اتنابڑھ گیاہے کہ بچے اس کے بوجھ تلے دب گئے ہیں اسی دباؤ کے تحت ہر بچہ ذہنی طور پر تھک چکا ہے۔ ایک معصوم بچے کی فریاد (جو کتابوں کے بوجھ سے پریشان ہے )کو انھوں نے اپنی نظم’’ معصوم دعا‘‘ کے تحت بیان کیا ہے بچہ دعا میں کہتا ہے کہ:
چھوٹا مجھ سے ہلا گلا ہلکا کر دے بستہ اللہ
مکتب کا ہے لمبا رستہ بھاری بھرکم میرا بستہ
ننھا منّا میں ہوں بچہ پڑھا لکھنا دوبھر لگتا
ناچوں کودوں من ہے کرتا کرنا مشکل توبہ تلّا
ہلکا کر دے بستہ اللہ
بچوں کو مذہب اور دین اسلام سے واقف کراتے ہو ئے مختارؔ ٹونکی نے اپنی نظموں میں نماز او ر قرآن کی عظمت کا ذکر کیا ہے ، مذہبی و دینی نظموں میںسورہ فاتحہ ( منظوم اردو ) نماز کی فضیلت ، قرآن کی شان ، عزم او ر رمضان کا مہینہ وغیرہ قابل ہیں۔ نماز کی فضیلت بیان کر تے ہوئے کہتے ہیں کہ:
ہراک برے عمل سے بچاتی ہے اک نماز دنیا و آ خرت کو بناتی ہے اک نماز
ہم نیکیوں کوپاتے ہیںبھر بھر کے جھولیاں ساری برائیوںکو مٹاتی ہے اک نماز
مردہ دلوں میں بھر تی ہے ایماں کی تازگی
تاریکیوں میں نوربہاتی ہے اک نماز
مختارؔٹونکی کی نظموں میں قومی اورحب الوطنی کا جذبہ بھی موجود ہے ۔ موجودہ دور میں ملک میں ہورہے فسادات نے لوگوں کا چین و سکون چھین لیا ہے۔ا ن سماجی اختلافات کو دور کرنے اور سماج میںامن و بھائی چارہ قائم رکھنے کی ضرورت ہے۔ اس سلسلے میں ان کی’’ سندیش‘‘ اور’’ گاندھی‘‘ اہم نظمیں ہیں۔نظم’سندیش‘ میں موصوف نے ملک میںامن وشانتی کا سندیش دیاہے او ر بچوں میں حب اوطنی کا جذبہ بھی بیدار کیاہے۔ اس نظم کا ایک بند ملاحظہ ہو :
گاندھی کے گیت گائیں گوتم کے گیت گائیں
دنیا کو امن کا یہ سندیش ہم سنائیں
سنسار والے سارے بھارت کومان جائیں
ہم امن و شانتی کا ایسا سبق پڑھائیں
بھارت کا نام اونچا دنیا میں ہم اٹھائیں
گاندھی کے گیت گائیں گوتم کے گیت گائیں
نا سمجھیوں سے پہلے برباد ہوچکے ہیں
برباد ہوچکے ہیں ناشاد ہوچکے ہیں
آ پس میںکیو ں لڑے ہم آزادہو چکے ہیں
بچھڑے ہو ئے دلو ںکو اک بار پھر ملائیں
موصوف کا تعلق چونکہ درس و تدریس سے رہاہے۔ تو انھوںنے اپنی نظموں سے ذریعہ بچوں کی ذہنی تربیت کر نے کی کو شش کی ہے ۔ انھوں نے علم کے پیرائے میں بچوں کوذہنی طور پر اس کے لیے تیار کرنے کی کوشش کی ہے۔کھیل کھیل میں بچے جلدی سیکھتے ہیں۔ اس کے علاوہ منظوم طریقے پر یا د کئے گئے سبق ان کے ذہن میںمحفوظ رہتے ہیں۔ ’’کتابیں ، ،گھڑی ہے نام میرا‘‘ دعوت عمل’’ محنت سے جی لگاؤ‘‘غیبت بری بلاہے‘‘ پہیلی ‘‘ویری گڈ‘‘ چھٹی نامہ ‘‘منظوم محاورے ‘‘ گنتی کا گیت‘‘ نوری پارے ‘‘ سال نو ‘‘ مکالمہ ‘‘میں پاس ہو گیا ہوں‘‘ میںفیل ہو گیا ہوں‘‘تقاضے ‘‘ مشورے‘‘ سیکھو بھئی سیکھو‘‘ اور گیند قابل ذکر نظمیں ہیں۔ ان کی نظم ’’گنتی کاگیت ‘ُ‘کاایک بندملاحظہ ہو:
کہتا سب سے نمبرایک رب کے آگے ماتھا ٹیک
پھر بولے نمبر دو ہمت اپنی تو مت کھو
دیکھو کہتا نمبر تین سب سے اچھا میرا دین
خوش خبری لایا چار ہوگا سب کا بیڑا پار
اس طرح کہا جاسکتا ہے کہ مختار ٹونکی نے ہلک پھلکے انداز کے ساتھ اپنی رواں دواں شاعری کے ذریعہ بچوں کو لبھایا ہی نہیںہے بلکہ ان کو گدگدایا بھی ہے۔ اس میں وہ ان کی تربیت کر نے میںبھی کماحقہ کا میاب ہوئے ہیں۔اظہار خیال کے لیے انھو ں نے بچوںکی زبان کا استعمال کیا ہے اور مشکل الفاظ سے پرہیز کیاہے ۔اختر شیرانی کے بعد ٹونک میں انھوں نے ہی بچوں کے لیے طفلی شاعری کا گراں قدر سرمایہ پیش کیاہے ۔
***
