محمد یوسف
لیکچرار اردو)پی ۔ایچ ۔ڈی اسکالر)
مابعد جدیداردو نظم میں تصور زندگی
(منتخب پاکستانی شعراء کے تناظر میں)
اردو میں مابعد جدید اردو نظم کی اپنی مخصوص شناخت قائم ہو چکی ہے۔اس انفرادی شناخت میں فکر وفن کی جدت کا اظہار نمایاں ہے۔موضوعات، اسلوب، تکنیک، لسانی تشکیلات، استعاراتی و معنوی حیثیت اور زبان و بیان کو الگ پہچان مہیا کی گئی ہے۔مابعد جدید اردو نظم کا عہد عمومی طور پر نوے کی دہائی سے اپنی منفرد پہچان بنانے میں کوشاں ہے۔ مابعد جدید نظم میں نئے تجربات کا عکس جدت کے ساتھ ابھرتا ہوا محسوس ہوتا ہے جس میں ایجاز و ابہام اور معنوی تہہ داری کا منفرد حسن ہے۔استعاریت اور علامتیت کے مروجہ نظام شاعری سے انحراف کا شعوری انداز سامنےآتا ہے۔مابعد جدید نظم کو ایک انحرافی انداز فکر کی بنیاد پر نئی شناخت مہیا کی جاتی ہے لیکن اکثر شعراء مابعد جدیدیت کے رنگ و آہنگ سے استفادہ کرتے محسوس ہوتے ہیں۔ مابعد جدیدیت اردو میں ہنوز اپنے مخصوص مفاہیم متعین کرنے کی تگ و دو میں مصروف ہے البتہ ایک شناخت کی صورت نمایاں ہوتی نظرآتی ہے۔مابعد جدیدیت کے بارے میں گوپی چند نارنگ لکھتے ہیں۔
میری الجھن یہ ہے کہ مابعد جدیدیت کی حتمی تعریف ممکن ہی نہیں۔مغرب میں
مابعد جدیدیت پس ساختیات کے ساتھ آگے کا مرحلہ ہے،ہمارے ہاں مابعد جدیدیت
جدیدیت سے آگےکا سفر ہے۔صورت واقعہ یہ ہے کہ مغرب میں ساختیات 1960ء
میں نہ صرف بار پا چکی تھی بلکہ فرانس میں اس کا سکہ چل رہا تھا۔تب ہمارےیہاں
جدیدیت ہاتھ پاؤں پھیلا رہی تھی،گویا تیس سال کا زمانی بعد یہاں بھی ہے۔(1)
جدیدیت اور مابعد جدیدیت میں حد فاصل قائم کرنے کی کوشش اردو میں جاری وساری ہے۔جدیدیت میں ہیت، مقصد، منصوبہ بندی، نظام مراتب، موجودگی، مرکزیت، عقلیت، معروضیت، عالمگیریت اورمغربی اقدار کو نمایاں مقام حاصل ہے جب کہ مابعد جدیدیت میں نراج، عدم مرکزیت، معلق پن، موضوعیت، ثقافتی اختلافات، مذہبی تکثریت اور ہمہ ثقافتی نقطہ نظر کو اہمیت حاصل ہے۔مابعد جدید اردو نظم میں بھی زندگی کو نئے اور انوکھے انداز سے پیش کرنے کا ہنر پوشیدہ ہے۔
ارشد معراج مابعد جدید اردو نظم کےنمائندہ شاعر ہیں۔کھتا نیلے پانی کی، اور ،دوستوں کے درمیاں،نامی شعری مجموعوں کے خالق ہیں۔ان کی نظم نگاری میں معاصر عہد کے مصائب ومسائل،زندگی کی لایعنیت،احساس تنہائی، قوت حیات کی کشمکش، تاریخی قصوں کی نئی معنویت، لسانی تشکیلات، تاریخ و فلسفہ کی اثر پذیری، اور زندگی کی جبریت کا عکس موجود ہے۔ان کے ہاں فرد کی گمشدہ شناخت کا المیہ، عشق و زیست کی کسک اور زندگی کا نیا فکری پہلو موجود ہے۔ ان کی شاعری میں زندگی کے نازل ہونے کا سوال ان کے مخصوص تصور زندگی کا عکاس ہے۔اپنی نظم ،تو بتاتا نہیں۔۔۔ میں وہ زندگی کے بارے میں ایک نئی فکر کو اجاگر کرتے ہیں۔وہ لکھتے ہیں
تو بتاتا ہے سب کو مجھے بھی بتا۔۔۔۔۔؟
حوصلہ ہے تو کر ابتدا۔۔۔۔۔!!!
زندگی کس طرح مجھ پہ نازل ہوئی
کیسے مانوس ہو گی حسیں وحشیہ
(یہ پرندہ کسی طور بھی دام میں اپنے آیا نہیں)
تو بتا۔۔۔۔
جانے والوں کے قصے،فسانے،زمانے پرانے سبھی
آنے والے دنوں کی کہانی بتا۔۔۔۔۔۔۔۔۔۔۔۔۔
چکر ورتی ۔۔۔۔۔یہ دھرتی کا قصہ ہے کیا؟
آبگینوں۔۔۔۔۔۔سفینوں کا ناتا ہے کیا؟
دن اور رات۔۔۔۔۔۔مہینوں کی بپتا ہے کیا؟
کیوں زمانوں کا چرخہ الٹ چال چلتا نہیں۔۔۔۔۔۔(2)
ان کی ہاں زندگی کی ماہیت جانچنے کی کوشش موجود ہے۔زندگی کی حقیقت کو کئی بامعنی سوالوں میں الجھا دیا گیا ہے۔زندگی کی جبریت اور بےثباتی کا بیان نمایاں ہے۔زندگی کی اصلیت کو سمجھنے کی ساری کوشش کے باوجود ایک بے بسی کا اظہار مابعد جدیدیت کا استعارہ بن کر ابھرتا ہے۔زندگی کو سمجھنے کے سارے چاک، چاک دان اور وسائل کو بامعنی ہونے کے باوجود تفہیم میں ناکافی بنا دیا گیا ہے۔اس ساری جبریت کے باوجود ان کے ہاں جینے کی ایک ادھوری خواہش موجود ہے۔شاعر کے استفہامی لہجے میں فکری شعور کی اثر پذیری موجود ہے۔لیل ونہار کی کروٹیں، مکافات عمل کی بدلتی اشکال، سات رنگی چھتریوں کے سجتے میلے، اجرام فلکی کی بدلتی صورتیں، آدم و آدمی کے مباحث اور مخلوقات کی پیدائش کے سلسلے شاعر کو الجھاے ہوئے ہیں۔پوری فکری کوشش کے باوجود زندگی ایک زندہ حقیت اور اپنے سوال کا خود ہی جواب محسوس ہوتی ہے۔
الیاس بابر اعوان کی شعری تخلیقات میں خواب دگر اور نووارد جیسے مجموعے شامل ہیں۔ان کی شاعری میں فریب زندگی کی کسک مستقل بے چینی کی صورت میں ابھرتی ہے۔زندگی کی بے ثباتی کے علاوہ اپنی رفتار سے گزرنے کا سوال الجھاؤ کا سبب معلوم ہوتا ہے۔اپنی ایک نطم،ہمارے دن گزر گئے،میں زندگی کےبارے میں لکھتے ہیں۔
گھروں میں کوئی پیڑ ہے نہ موتیے کی بیل ہے
نہ دال کو بھگارتی ہوئی جوان لڑکیاں
کہ سب چلن بدل گیا
فراغتوں کے دن گئے
گئیں وہ کنج وقت کی سفید ریش ساعتیں
شجر کی راہداریاں اجڑ گئیں
گھنی دوپہر میں
کھلی کھلی سی دھوپ کا سفر رک گیا
جھکے جھکے مزاج پر تنی تنی سی الجھنیں
دلیل سے ورا ہے ساری گفتگو کا سانحہ
ذرا زرا سی زندگی ،بڑا بڑا سا خوف ہے۔(3)
زندگی کا بے قابو اڑیل گھوڑا سبک رفتاری سے گزرتے ہوئے شاعر کو جھنجھوڑتا ہے اور ایک خاموش تماشائی کی مانند حیرانی کا احساس ابھرتا ہے۔زندگی کی بے مہار سمت و رفتار مصروفیات کا ایک جال بن رہی ہے جہاں شب وروز کے سلسلے دراز ہو رہے ہیں۔زندگی فرد کو سلجھنے کی موقع میسر نہیں کرتی اور فرد اپنی خواہشات کے برعکس
تنکوں کی مانند رفتار حیات سے اڑا جا رہا ہے۔زندگی کے جھمیلے فرد کو یوں الجھاتے ہیں کہ اپنی شناخت ہی لمحہ بہ لمحہ گم ہوتی محسوس ہوتی ہے۔
گھروں کا بدلتا منظر نامہ، گھنی دوپہر اور کنار شام کا نقرائی لباس، ضعیف لاٹھیاں، ٹائروں کی گرد میں گزرتا پچپن، سانولے حجابوں کی مسکڑاہٹیں اور جلتے بجھتے دیپ زندگی کے مختلف دائرے بن کر زندگی کے سوال کو مزید پیچیدہ بنا رہے ہیں۔ہر بدلتا منظر احساس حیات کے قرطاس پر نئی تحریروں کو رقم کر رہا ہے۔ زندگی کی تگ ودو میں چند لمحوں کا سکوت زمان و مکان کو گڈمڈ کرتا محسوس ہوتا ہے۔انسان کی گمشدگی تقسیم در تقسیم کے لامتناہی سلسلوں میں الجھ سی گئی ہے جہاں شاعر راز حیات کو کسی دلیل سے سلجھانے کے بجائے یہ کہتا ہوا محسوس ہوتا ہے کہ ہمیں فریب زندگی ذرا سا کام کیا پڑ ا کہ ہمارے دن گزر گئے۔
شاعر کے ہاں فلسفہ حیات کے ان گنت سوال پوشیدہ ہیں جہاں زندگی کا بے معنی پن، بے ہنگم رفتار کی انسانی بے بسی اور ذات کی دریافت کا مسلئہ زیادہ شدید نوعیت کا ہے۔
داؤد رضوان کی شعری کائنات میں زندگی کا مابعد جدید تصور بھی ایک نئی پہچان سے اجاگر ہو تا ہے۔ان کے ہاں زندگی کی حقیقت ایک بے خوابی کی کیفیت میں الجھ کر رہ گئی۔زندگی ان کے ہاں ایک افسردہ اور بے معنی سائے کی صورت میں جلوہ گر ہے۔زندگی ان کے ہاں سب کچھ ہونے کے باوجود کچھ بھی نہیں ہے۔ایک بے نام سایہ، ایک بدمزہ حقیقت، قلیل لمحوں کا عکس اور بے معنی خواب کی بے معنی تعبیر ہے۔ان کی نظم ،بے خوابی میں ایک کیفیت،میں وہ یوں لکھتے ہیں۔
زندگی بے مزہ حقیقت ہے
کوئی میٹھا نہ کوئی کڑوا پن
خواب ہیں یا شہاب ثاقب ہیں
اک پل کو بھڑک کے بجھتے ہیں
راکھ بن کر بکھر جاتے ہیں
ایک روشن لکیر آنکھوں میں
دیر تک عکس بن کر بہتی ہے
کوئی افسردگی سی سایہ بنی
ذات کے ساتھ ساتھ چلتی ہے (4)
شاعر کے ہاں زندگی کو اپنی خواہشات کے تابع کرنے کی خواہش موجود ہے۔زندگی کو پسندیدگی کے بجائے بد مزہ اور غیر پسندیدہ حقیت کے طور پر پیش کیا گیا ہے۔لیل و نہار کی کروٹیں انسانی خواہشات سے ماوراء ہیں جہاں زندگی بے معنی شے کی طرح ایک بھڑکتی چنگاری کے مماثل ہے۔زندگی کو شہاب ثاقب یا ایک خواب کے درمیان جھولتی ہوئی شے کے طور پر بیان کیا ہے جس پر مٹنے کا خوف طاری ہے۔زندگی کو حقیت کی ایک روشن لکیر سے بنتے عکس کا استعارا قرار دیا گیا ہے جہاں زندگی خود اپنی حقیقت سے عاری ایک سائے کی تصویر ہے۔شہاب ثاقب، روشن لکیر اور بدمزہ حقیقت نامعلوم حقیقت کی علامت ہیں۔
روش ندیم کی نظم نگاری میں ٹشو پیپر پہ لکھی نظمیں اور دہشت کے موسم میں لکھی گئی نظمیں، مابعد جدیدیت کے افکار سے مزین ہیں۔ کائناتی راز، ان کہی آیات کی تلاوت، مذہبی ہم آہنگی، علت و نتائج کی کشمکش، تاریخی اوراق کو دودھیا کرنے کی خواہش، کائناتی تفہیم کی کاوش، ٹشو پیپر کی تقدیریں، نسوانی کرب، منزلوں کا تعاقب، آکاس بیل کے جھمیلے، تلاش ذات، دانش ورانہ فکر، گیانی کرب، ویدوں کی کھوج اور زندگی کو سمجھنے جیسے عناصر موجود ہیں۔اپنی نظم ، دستاویز میں لکھتے ہیں۔
حیات قرنوں کی یک شرارت
ازل سوالوں کا اک کھنڈر ہے
یہ بھید مایا کا کون کھولے؟
یہ بوڑھے بھکشو کو کیا پتہ ہے
کہ قصر مایا کا آہنی در شکستہ مندر کی چابیوں سے کھلا ہی کب ہے؟(5)
روش ندیم کی فکر میں مابعد جدید فکر کے ساتھ ساتھ مارکسی فلسفے کی دل چسپی بھی نمایاں ہے۔ان کے ہاں حیات و معاش کی الجھنیں متوازی چلتی ہوئی محسوس ہوتی ہیں۔زندگی ان کے ہاں بھی ایک ان کہی کہانی کا ادھورا انجام معلوم ہوتی ہے۔زندگی ان کی شاعری میں عناصر کی ایک بےترتیب شرات کے سوا کچھ بھی نہیں۔زندگی کی اصلیت کو شاعر کی فکر بھکشوں،ویدوں اور دیگر مابعد الطبعیاتی وسائل سے سلجھانے کے باوجود استفہامی کیفیت سے دوچار ہے۔حیات کائنات کی فلسفیانہ تفہیم کا عکس روش ندیم کی شاعری میں نمایاں جہت بن کر ابھرتا ہے۔زندگی ان کے ہاں بھی الجھے ہوئے سوالوں کا لا متناہی سلسلہ ہے جہا ں انسانی عقل بے بسی کی دہلیز پر کھڑی محسوس ہوتی ہے۔
عصمت حنیف کی نظم نگاری میں مابعد جدید یت کا تصور زندگی پوری طرح عیاں ہے۔وہ بھی زندگی کی دائروی حرکت کے قائل ہیں جہاں بدلتے منظر نامے زندگی کو لایعنیت کی سمت دھکیلتے ہیں۔ان کے ہاں زندگی کی گرفت سے آزاد ہونے کی خواہش اور من پسند زندگی جینے کی آرزو موجود ہے۔وہ زندگی کے محور سے نکلنے کی کوشش میں مصروف ہیں۔ان کی ایک نظم ،زندگی سے باہر گرا ہوا ایک دن،اس فکر کی آئینہ دار ہے۔ نظم کا انداز ملاحظہ ہو۔
میں شاہد وقت کی ڈھلوان سے پھسلا تھا
اور پھر دائرے کی کھینچ سے باہر نکل آیا
گردش کی طنابیں توڑ کر
اک اجنبی وسعت کی آسودہ پناہوں میں سمیت آیا تھا
تاحد نظر سر سبز نیلے سرمئی اسرار میں
لپٹی ہوئی وسعت
مکاں تا لامکاں پھیلی
سنہری دوپہر کے تھال میں
مخمور سناٹے کے بھیدوں میں
دراڑ یں ڈالتی بے چہرا آوازیں
یہ میں کس منطقے پر تھا؟(6)
شاعر کے ہاں نظام زندگی سے بغاوت ابھرتی ہے جہاں گردش زمانہ کی مضبوط طنابوں کو توڑ کر ایک آسودہ حال اجنبی وسعت کا خواب پوشیدہ ہے۔شاعر ایک ایسے منطقے پر زندگی بسر کرنا چاہتا ہے جہاں جبریت کا آئینی پنجہ موجود نہ ہو۔ مناظر فطرت کی آسودگی کے ساتھ تمام خواہشات کا حصول ممکن ہو سکے۔اس کے ساتھ زندگی کو ایک معدوم ہوتے خواب سے تشبیہ دی گئی جہاں حقیت و تصور کی حدیں باہم دست و گریباں ہیں۔
فہیم شناس کاظمی کی نظموں میں زندگی کا تصور بھی بے ثباتی اور عدم تکمیلیت کے گرد گھومتا ہے۔زندگی کی اصلیت کو شام کے کنارے پر چند لمحوں کےثبات سے سمجھایا گیا ہے۔ان کے ہاں خوشنما زندگی کی سرحد تلاشنے کا رجحان موجود ہے۔وہ لکھتے ہیں۔
شام کے کنارے پر
خوش نما ستارہ ہے
زندگی کے دریا میں
کیا عجیب دھارا ہے۔
خوش نما ستارہ بھی
رات کا اشارہ ہے
شام کے کنارے پر
خوش نما ستارہ ہے (7)
شاعر زندگی کے جامد پن کے برعکس دریا کے دھاروں سے زندگی کی قوت و روانی کو ماپتا ہے۔دھاروں کا سفر، راستوں کی خوشبو، خوش گوار لمحات کی کسک اور فکر و اضطراب کا اظہار منفرد عناصر ہیں جہاں نئی لفاظی کی شعوری کوشش ہے۔شاعر زندگی کو شام اور خوشنما ستارے کی استعاریت میں گہری فکر سے روشناس کراتا ہے جہاں زندگی کی تفہیم کا الجھاؤ مستقل صورت گری سے اپنے نقوش ابھارتا ہے۔
ناہید قمر کے فکری رویے بھی مابعد جدید فکر سے لبریز ہیں۔زندگی کے حاشیے پر ان کی نظر بھی زندگی کی الجھن کو سلجھانے میں گم ہے۔ان کے ہاں بھی زندگی دائروں میں چلتی ہوئی محسوس ہوتی ہے۔ان کے ہاں زندگی کے دائرے دل کے مرکز سے درد قوسیں اور وحشت کے زاویے بناتے ہوئے گزرتے ہیں۔ان کی زخم گریہ اپنی ستر پوشی کے لیے ستاروں کو ہمسفر بنا کر گم شدہ گھروں کی متلاشی بنتی ہے۔ان کے ہاں زندگی کے دھندلکے گمان کے دھوکے میں الجھے ہوئے ہیں۔زندگی کی حقیقت کو آئینوں کی کرچیوں اور ریت کی مٹتی تصاویر سے ابھارا گیا ہے۔وہ زندگی کے بارے میں لکھتی ہیں۔
دل کے نقطے سے درد کی قوسیں
ضبط کے، گرد باد حیرت کے
ہجر کی وصل ساز وحشت کے
ان گنت زاویے بناتی ہیں
زندگی دائروں میں چلتی ہے
اور سب دائرے ادھورے ہیں۔۔(8)
زندگی ان کے ہاں خط مستقیم کی آسان راہوں کے برعکس اپنے خود ساختہ دائروں میں محو سفر ہے۔ہر دائرے کا مرکز، قوس اور اطراف کے تمام زوایے اپنی تشکیل میں تشکیک و ابہام سے پر ہیں۔ہر دائرے کے اندر کئی ضمنی دائرے زندگی کی پیچیدگی اور الجھاؤ کی عکاسی کرتے ہیں جہاں فرد زندگی کی اصلیت کو تلاش کرتے ہوئے خود کی شناخت کھو بیٹھتا ہے۔
یامین کے ہاں بھی دھوپ کا لباس زندگی کو سمجھنے اور تفہیم حیات کا اظہار ہے۔ان کے ہاں زندگی کی بے یقینی اور عارضی پن کو سمجھنے کی فکر اجاگر ہوتی ہے۔ان کی ایک نظم بعنوان زندگی ملاحظہ ہو۔
انتظار کے بوجھ سے جھکا ہوا
غصیلی بارش کا ایک دن
آنکھوں میں چھپی ہوئی ایک برفیلی شام
ٹھٹھرتے ہوئے دل میں
محبت کی گرمی جتاتی ہوئی ایک عورت کی باتیں
لمحہ لمحہ قربان ہوتی ہوئی زندگی کا
ایک حصہ (9)
زندگی ان کے ہاں بھی غصیلی بارش کے ایک دن، ایک برفیلی شام میں محبت کا راگ الپاتی ایک عورت کی باتوں کے سوا کچھ بھی نہیں۔ان کے ہاں زندگی کل کے بجائے جزو کی ناقابل بیان اکائی ہے جہاں فرد اپنے زندگی کو کئی بخروں میں تقسیم کرتے کرتے اپنی شناخت ہی کھو دیتا ہے۔ اس کے لیے زندگی چند لمحوں کا موت سے معرکہ ہے جہاں فرد یقینی شکست اس کا مقدر بنتی ہے۔
مابعد جدید اردو نظم کی رنگا رنگی اور اپنی شناخت کو منفرد بنانے کا سفر جاری و ساری ہے۔ اس نوعیت کی نظم میں ایک بغاوت کی آواز ابھرتی ہوئی محسوس ہوتی ہے۔شاعری کے مروجہ دیگر مو ضوعات کے ساتھ ساتھ زندگی کی
تفہیم کو بھی ایک الجھاؤ اور ناقابل بیان حقیت کے طور پر اجاگر کیا گیا ہے۔
حوالہ جات۔
ا۔گوپی چند نارنگ،مرتبہ،اردو مابعد جدیدیت پر مکالمہ، سنگ میل پبلی کیشنز، لاہور، 2000،ص 96
2۔ارشد معراج،نظم، تو بتاتا نہیں،مشمولہ نظموں کا در کھلتا ہے۔مثال پبلشرز، فیصل آباد،2017،ص 23۔
3۔الیاس بابر اعوان، نظم ،ہمارے دن گزر گئے،ایضاً ص 29
4۔داؤد رضوان۔نظم،بے خوابی میں ایک کیفیت،مشمولہ نظموں کا در کھلتا ہے، ص 95۔
5۔روش ندیم۔نظم،دستاویز،ایضا ص119
6۔عصمت حنیف۔نظم۔زندگی سے باہر گرا ہوا ایک دن۔ایضا ص174۔
7۔فہیم شناس کاظمی۔نظم۔خوش نما زندگی کی سرحد پر۔ ایضا ص217۔
8۔ناہید قمر۔ نظم،زندگی دائروں میں چلتی ہے۔ص 228۔
9۔یامین۔نظم،زندگی،مشمولہ،نظموں کا در کھلتا ہے،مثال پبلشرز،فیصل آباد،2017،ص 248۔
***
