ڈاکٹر حسنین ساحر

غزل

کیا بتاؤں کیا ستم اس دل پہ کر جاتی ہے یاد

اب حدودِ جاں سے بھی اکثر گزر جاتی ہے یاد

میری آنکھوں کے چمن سے چھین کر رنگِ بہار

پیچھے آنکھوں کے سمندر میں اُتر جاتی ہے یاد

رتجگوں سے کیسا بندھن بندھ گیا ہے ان دنوں

کروٹیں ہر شب مِرے بستر پہ دھر جاتی ہے یاد

میرے چہرے سے عیاں ہوتا ہے میرا حالِ دل

جب بھی آتی ہے تو چہرے پر بکھر جاتی ہے یاد

ہجر کے صحراؤں میں رہتی ہے رقصاں رات بھر

جب بھی چلّاتی ہے تنہائی تو ڈر جاتی ہے یاد

ڈوبنے لگتا ہے جب بھی آفتابِ شامِ غم

چپکے چپکے دل کے آنگن میں اُتر جاتی ہے یاد

فصلِ گل ہو یا دَھنک ہو چار سُو پھیلی ہوئی

میری دنیا میں خزاں کے رنگ بھر جاتی ہے یاد