شوکت محمود شوکتؔ
پٹنہ
حمد باری تعالیٰ
کرم تیرا کہ تُومالک!نہاں بخشے،عیاں بخشے جہاں تک سوچ ہی جاتی نہیں ہے تُووہاں بخشے
پہاڑوں کو زمیں پر گاڑ دے بہر توازن تُو سمندر کو تلاطم خیزیاں ،آبِ رواں بخشے
ادھر،سینے کو دل بخشے کہ جس میں عشق تیرا ہو اُدھر ،حمد و ثنا کے واسطے منہ کو زباںبخشے
تری حکمت ،کہ رکھے نکہتِ گل ان ہوائوںمیں تری قدرت،گھٹائوں کو جو تُو برقِ تپاں بخشے
عطا دن میں کرے مہرِ درخشاں،میرے مالک تُو شبِ تاریک میںماہِ منّور ،کہکشاںبخشے
خزاں ہو یا بہاراں ہو،وہ گرمی ہو کہ سردی ہو ترا جود و کرم تُو نے ہمیں کیا کیا سماں بخشے
تری صنّاعی شاہد ہے تری تخلیقِ اَحسن پر نہ شے کوئی عبث پائی ،نہ عالم رائگاں بخشے
تری یہ بے نیازی،لا مکاں ٹھہرا ہے تُو ،لیکن ہمیں رہنے کو گھر بخشے ،محل بخشے،مکاں بخشے
تری تقسیم کو سمجھے بھلا کیا فہمِ انسانی کسی کو بخش دے بیٹے،کسی کو بیٹیاںبخشے
جو تیری یاد سے غافل ہیں دل،سارے وہ مردہ ہیں کہ تیرا ذکر ہی دل کو حیاتِ جاوداں بخشے
کبھی شاہوں پہ کردے تنگ اپنی سب عمل داری کبھی بے آسرا بچے کو تُو شانِ شہاں بخشے
کبھی کچھ دن کے مہماں کو نوید زندگانی دے کبھی مطلق بھلے چنگے کو مرگِ ناگہاں بخشے
نوازا پہلے آدم ؑکو بہشت و خلد سے یا رب! اُسی آدم کو پھرتُو نے زمیں بخشی ،زماں بخشے
سفینہ نوح ؑ کا چلتا رہے طوفان میں،لیکن اُسے رکنے کو ’’جودی‘‘سا کوئی کوہِ گراں بخشے
کبھی یعقوبؑ کو محروم کردے تُو بصارت سے کبھی ایوبؑ کو صبرِ جمیل بے کراں بخشے
کبھی یوسفؑ کو تختِ مصر دے کربادشاہی دے کبھی یوسفؑ کو جنگل میں کوئی اندھا کنواں بخشے
کبھی گل زار کر دے آتشِ نمرود کو فوراََ کبھی موسیٰ ؑ کو دشمن ہی کے گھر میں تُو اماں بخشے
بچا لے دار پرعیسیٰ ؑ کو اپنی مہربانی سے محمد ؐکو بلا کر آسماں،سیر ِجناںبخشے
تری عظمت ،تری شوکت،بیاں ہو کس طرح ہم سے کہ تُو اذنِ سخن بخشے،کہ تُو حسنِ بیاں بخشے
***
