You are currently viewing عیدمبارک

عیدمبارک

 عارف نقوی

برلن ، جرمنی

عیدمبارک

(ہر سال عید کے موقع پر مجھے اپنی اس نظم سے روحانی تازگی ملتی ہے)

عید  آئی  ہے  تو  لگ جائو  گلے سے میرے

دوستو   آج   تو   بیزارِ   محبت    نہ    بنو

رحمتیں  عرش سے نازل ہیں  جہاں پر  تیرے

سجدہء   شکر  ہو   آزارِ   محبت   نہ     بنو

عید   آئی  ہے  تو   ایمان  کو  تازہ   کر لو

میکدہ   چھوڑ  کے   دنیا   میں  گزارہ  کر لو

دل کے  ایون  میں  روشن ہے جو  قندیل  ِ خرد

جلوہء  طور  کا  ہر  شے  میں   نظارہ   کر لو

عید  آئی  ہے  تو   اعلانِ   رفاقت  کر دو

امن  و  انصاف  کا  اخلاص  کا  پرچم  کھولو

بیکس  و  بے بس  و  بے آسرا   لوگوں  کیلئے

زیست کو  زیست کر و  دل کے  دریچے  کھولو

سجدہ شکر  میں  جاتے  ہوئے  کہنا   عارفؔ

میرے   اللہ   میرا   سازِ  محبت   سن  لے

بدلیاں  چیر  کے  تاروں کو  نمایاں  کر دے

شب کے سنّاٹے میں اک بار  چراغاں کردے

عید آئی  ہے  تو  لگ جائو  گلے  سے میرے

سجدہء شکر  کریں  مل کے  گزارش کر لیں

میرے  اللہ ہر ایک شے میں  تجلّی  بھر دے

قلبِ انسان  کو   انسان  کے  قابل کر دے

عید  آئی ہے  تو  لگ جائو  گلے سے  میرے

***

Leave a Reply