وقاراحمد
چار نثری نظمیں
امن کا نام لے کر
امن کا نام لے کر
میں نے بیس کبوتر آزاد کئے
تو مجھے کسی نے بھی نہ دیکھا
پھر ایک گھنٹے بعد
امن کا نام لے کر
میں نے دس گولیاں چلاٸی
تو گلی میں مجمع لگ گیا
اب ہر چھوٹے بڑے کی نظریں
میری طرف تھی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کشش ثقل
نیوٹن نے کہا تھا
زمین ہمیں اپنی طرف کھینچتی ہے
اس میں کشش ثقل ہے
پھر میں نے دیکھا
دو مزدوروں نے اپنے حق کے لیےآواز اٹھائی
لیکن عدالت نے ان کے سچ کو روند ڈالا
دونوں نے چھت سے چھلانگ لگا کرخودکشی کر لی
تب مجھے یاد آیا
نیوٹن نے جو کہا تھا، وہ سچ تھا
زمین میں واقعی کشش ثقل ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحفہ
مجھے لگتا تھا
تمہاری طرف سے
چمبیلی کے بدلے
گلاب کے پھول ملیں گے۔
پر یہ کیا؟
تم نے مجھے پستول تحفے
میں بھیجا ہے۔
کیا یہ؟
امن،پیار اور محبت کی
نشانی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بارش کی بوندوں میں تبدیل ہوتا بدن
سیاہ کالے بادل
ہمارے سر پر آچکے ہیں
چلو ایسا کرو
بادلوں میں چھپ جاو
اور
بارش بن کر مجھ پر برسو
جب بارش کی بوندیں
میرے بدن پر پڑیں گی
تو میرا
بدن بھی
بارش کی بوندوں میں تبدیل
ہو جائے گا۔
